Денсаулық сақтау министрлігінде "Омикрон" штаммымен ауыратын науқастарға көмек көрсету бойынша өңірлердің дайындығы талқыланды

ҚР Денсаулық сақтау вице-министрі Ажар Ғиният "Омикрон" КВИ-мен ауыратын науқастарға медициналық көмек көрсету бойынша өңірлердің дайындығы жөнінде кеңес өткізді.
Іс-шараға ҚР ДСМ департаменттері мен комитеттерінің басшылары, әлеуметтік медициналық сақтандыру қорының өкілдері және өңірлердің денсаулық сақтау басқармаларының басшылары қатысты.

ҚР ДСМ медициналық көмекті ұйымдастыру департаментінің директоры Азамат Дүйсенов өңірлерде COVID-19 ауруының күрт өскені туралы баяндады.

Мысалы, Нұр-Сұлтан қаласында соңғы 4 күнде КВИ жұқтырудың жаңа жағдайларының саны 170-тен 1442 жағдайға дейін артты.

"Аурудың күрт өсуіне байланысты өңірлер "Омикрон" КВИ - мен ауыратын науқастарға медициналық көмек көрсетуге жедел дайындалуы қажет", - деп атап өтті А.Дүйсенов.

Айта кететін жайт, бүгінде республикада барлық МСАК ұйымдарында КВИ бар пациенттерге уақытылы медициналық көмек көрсету мақсатында МСАК деңгейінде COVID-19-бен ауыратын науқастарды бақылау бойынша мобильді бригадалар ұйымдастырылды.

Бүгінгі таңда 3270 мобильді бригада жұмыс істейді, оның 1752-сі ауылда, 160-ы резервте.

Шұғыл медициналық көмек көрсету үшін 1486 жедел медициналық жәрдем бригадасы, 33 әуе кемесі, оның ішінде: 20 ұшақ және 13 тікұшақ бар. 149 жылжымалы медициналық кешен жұмыс істейді.

Ағымдағы жылдың 10 қаңтарындағы жағдай бойынша 14696 төсек-орны бар, төсектердің жұмыспен қамтылуы 16%-ды құрайтын 256 медициналық ұйым республикада коронавирустық инфекциясы бар пациенттерге медициналық көмек көрсетуде.

Эпидемиологиялық жағдай ушыққан жағдайда КВИ емдеу үшін 50 мыңға дейін инфекциялық төсек-орын беру мүмкіндігі бар.
Өз кезегінде денсаулық сақтау вице-министрі Ажар Ғиният сырқаттанушылық күрт өскен жағдайда COVID-19-ға байланысты көмек көрсету бағыты бойынша ден қоюды қамтамасыз ету үшін және халықтың басқа да медициналық қажеттіліктеріне байланысты МСАК негізгі қызметтерін ұсыну үшін МСАК-ның қызметтер режимін жедел өзгертуді тапсырды.

Сонымен қатар, МСАК ұйымдарына COVID-19 жағдайларын ерте анықтауды қамтамасыз ету, тестілеуге қолжетімділік беру, карантиндегілермен байланыста болғандарды және үйде оқшауланған COVID-19 пациенттерін мониторингтеу қажет.

Сондай-ақ, вице-министр коронавирустық инфекцияның таралуын болдырмау шаралары бойынша бірқатар нақты тапсырмалар берді.
Мәселен, МСАК деңгейінде:
1) Сүзгі-кабинеттердің жұмысын күшейту, қажет болған жағдайда қосымша кабинеттер ашу;
2) МСАК ұйымдарына барудың шыңы сағаттарында пациенттер легінің бөлінуін ерекше бақылауға алу;
3) Call-орталықтардың жұмысын жандандыру;
4) ахуалдық орталықтардың жұмыс істеуін қамтамасыз ету;
5) үйдегі пациенттерді динамикалық бақылау бойынша жұмысты күшейту;
6) қашықтықтан медициналық қызметтерді белсенді пайдалану;
7) диагностикалау мен емдеудің клиникалық хаттамаларына сәйкес пациенттерді жүргізу;
8) мобильді бригадалардың резервін дайындау;
9) МАЖ дәрігерлерді қабылдау кестесін өзектендіру.
Стационарлық деңгейде:
1) күн сайынғы негізде инфекциялық төсектердің жұмыспен қамтылуына мониторинг жүргізу;
2) ауыр науқастардың саны өскен жағдайда резервтік төсектердің (инфекциялық және реанимациялық) жұмыс істеуі бойынша ұдайы дайындықта болу.