ҚР-да КВИ бойынша жағдайды тұрақтандыру үрдісі байқалады - А.Цой
Бүгін ҚР Денсаулық сақтау министрі Алексей Цой мен ҚР ДСМ санитарлық-эпидемиологиялық бақылау комитетінің төрағасы Айжан Есмағамбетова ҚР Президенті жанындағы Орталық коммуникациялар қызметінде өткен брифингке қатысып, елдегі санитарлық-эпидемиологиялық жағдай және халықты КВИ-ға қарсы вакцинациялау туралы айтып берді.
Эпидемиологиялық жағдай матрицасына сәйкес Қазақстан Республикасы он күн бойы жасыл аймақта тұр. Нұр-сұлтан қаласы жоғары эпидемиологиялық аймақта орналасқан, сары аймақта үш аймақ бар: Атырау, Батыс Қазақстан, Қарағанды облыстары. Қалған 13 өңір – жасыл аймақта.
Мамыр айының басынан бастап аурудың төмендеу үрдісі байқалады. Маусымның 15 күнінде мамыр айының сәйкес кезеңімен салыстырғанда ауру деңгейі 1,7 есе төмендеді. Ағымдағы жылғы 16 маусымдағы жағдай бойынша республика бойынша инфекциялық төсек-орындардың қамтылуы 23%-ын, реанимациялық төсек-орындардың қамтылуы 21%-ын құрайды. Соңғы айда стационарлық емделудегі науқастар саны 2,1 есеге, амбулаториялық емделуде 1,7 есеге азайды.
Сырқаттанушылық деңгейін төмендетуге бағытталған негізгі шаралардың бірі вакцинация болып табылады.
2021 жылдың ақпан айынан бастап өңірлерге 6,2 млн.астам вакцина жеткізілді, оның ішінде 3 млн. доза І компонент және 1,6 млн. доза «Спутник V» вакцинасының ІІ компоненті вакцинасы, 100 мың доза «QazVac», 1 млн. доза «Hayat Vax SARS-CoV-2 Vero Cell» вакцинасы (Синофарм), 500 мың доза «КоронаВак» вакцинасы (Синовак).
Бүгінгі күні вакцинаның 4,0 млн дозасы пайдаланылды, оның ішінде бірінші компонентпен 2 587 884 адам егілді, бұл тиісті халықтың 26%-ын құрайды. Екінші компонентпен 1 480 309 адам қамтылды.
Егу пункттерінде шамамен 1 млн 216 мың бірінші компонент және 1 млн 182 мың екінші компонент бар.
Сонымен қатар, осы аптадан бастап Қытайда өндірілген КоронаВак вакцинасы халыққа да қол жетімді болды. Бұл 18 жастан асқан адамдарды вакцинациялауға арналған белсенді емес вакцина. Вакцинация кестесі 14-28 күн аралығындағы екі дозадан тұрады.
А. Цой айтып өткендей, еңбек демалыстары қарсаңында ел ішінде де, шетелдерде де халықтың қозғалыс қарқындылығы артады. Осыған байланысты Сыртқы істер министрлігі коронавирустық инфекцияға қарсы вакцинациялау паспорттарын өзара тану мәселесін пысықтауда. Осылайша, қазірдің өзінде Қазақстан Венгриямен, Таиландпен және Моңғолиямен өзара түсіністікке қол жеткізді.
Ауыр зардаптардың алдын алу үшін Денсаулық сақтау министрлігінің басшысы халықтан тағы да ойлануды және дұрыс шешім қабылдауды - өз денсаулығына қамқорлық жасауды және вакцинациялауды сұрады. Өйткені, вакцинация - вирустың таралуын азайтудың және туыстарымен, әріптестерімен, достарымен қауіпсіз қарым-қатынасқа оралудың жалғыз жолы. Сонымен қатар, Қазақстанда ұжымдық иммунитет қалыптасқанға дейін маскаларды кию, қашықтықты сақтау, антисептиктерді қолдану сияқты алдын алу шараларын сақтауды жалғастыру қажет.
